Dr Kate Barber, Ieithyddiaeth, Prifysgol Caerdydd 

Teitl: Casineb ar Ffurf Naratif: Ymchwilio i niwed posibl naratifau ar-lein o drais rhywiol ar y ffin rhwng goruchafiaeth gwyn a gwrywaidd a’i liniaru.  

Gwnaeth fy ymchwil PhD archwilio sut mae disgyrsiau trais rhywiol yn erbyn menywod yn cael eu datblygu mewn erthyglau blog a gyhoeddir gan gymunedau dde eithafol a misogynistaidd ar-lein. Gan ddefnyddio dull dadansoddi disgwrs cymdeithasol-wybyddol yn seiliedig ar gorpws i archwilio’r erthyglau blog, archwiliais sut mae gwybodaeth a chredoau ynghylch treisio ac ymosodiadau rhywiol yn cael eu mynegi, eu hawgrymu a’u dilysu gan y blogwyr a sut mae’r grwpiau yn debyg ac yn wahanol o ran eu safbwynt ideolegol ynghylch trais rhywiol.  

Roedd agwedd allweddol ar fy mhrosiect PhD yn cynnwys astudio naratifau o fewn yr erthyglau blog. Roedd ymchwil flaenorol yn canolbwyntio ar gynnwys disgyrsiau naratif, yn hytrach na’r ffyrdd y cânt eu datblygu i gyflawni byd stori cynhwysfawr gyda’r gallu i ennyn diddordeb eu darllenwyr a dylanwadu arnynt. Ar gyfer fy PhD, defnyddiais ddadansoddiad naratif y tu hwnt i archwilio cynnwys er mwyn canolbwyntio yn lle hynny ar elfennau strwythurol y naratifau hyn. Mapiais sut mae’r awduron yn datblygu’r bydoedd stori hyn; sut mae hunaniaethau’n symud ar draws elfennau o’r naratifau; a sut mae’r coda, h.y. y rhan o’r stori sy’n cysylltu gweithredoedd y gorffennol â realiti’r presennol, yn cael ei ddwysáu fel dyfais radicaleiddio. Datblygodd fy ymchwil ochr yn ochr â strategaeth amgen sy’n dod i’r amlwg yn lle gwrth-naratifau: naratifau brechu. Yn hytrach na mynd yn groes i gredoau sydd eisoes wedi’u gosod, mae naratifau brechu yn cynnig math o frechiad agweddau yn erbyn tactegau darbwyllo a ffordd fwy effeithiol o gyfyngu ar ddylanwad propaganda ar-lein.   

Mae’r prosiect Cymrodoriaeth hwn yn mynd i ganolbwyntio ar ymestyn fy ymchwil ar naratifau eithafwyr a’m helpu i’w rannu mewn cynadleddau a chyhoeddiadau. Byddaf hefyd yn rhwydweithio gydag asiantaethau a chanolfannau ymchwil sy’n gweithio ar flaen y gad o ran ymchwil naratifau brechu ac sydd, yn bwysig, yn defnyddio’r strategaeth hon i astudiaethau peilot a newidiadau polisi gyda rhanddeiliaid ym myd technoleg.  

Ebost: BarberK@cardiff.ac.uk